David Herbert Lawrence

David Herbert Lawrence ba 11/09/1885 koe Eastwood ( Engla ) kobliyir.

Inafa sposuca wetce siskesik va ikruca is bilitafa kofiga kralisa va inaf yolt, va kuluca ke grabomeem kodoplekus va yon berpot isu berpotam isu ezla isu koyaranega isu wenyaxa isu lingeks don konaka decitoya twa is tanoy izvaf kost al tuflovamayad.

Lawrence va rumeugal koe Midlands tiskiyir, i koe tawadayafa is kawodafa belcon gola vanpiyisa sedme int leca ke folvaf kelor wal guazanyafa Engla is rabevaf witaf seltay, i deona plawukesa va bocaf berpot ( Lady Chatterley's Lover ~ Fertye ke Chatterley Oluya ). Ewavon gu vogola, inafa yasa tiyir sollipawesa tamava di pimtayana koe mivizvaf berpot ( Sons and Lovers ~ Yone Nazbeye isu Fertik , 1913 ).

Arthur Lawrence gadikye, i maytaf is saipaf kawodik, va tixolafa Lydia Beardsall tuke altofa ubuca al brostayar, i va savsaf bematavesik vey glastackafa is folixepesa yasa. Aluboy nazbeik vey sint al kobliyid. Sutuca is vieleaf argeeem va amidaceem wal bata febafa gadikya is kurenikye mempesafe is ulidjafe adre al laumasiyid. Mali tozafa jekura, blira kalion vanpiyir elupkafa koboda. Jotaf David Herbert kalnendan gan gadikya nope rantafa galuca va ina skeon lotiyir solve tiyir kinokackaf gu gadikye.

Kaikion arti lanote ugal, nope tutrovgasa keska dimrokasa va gadikyefa is ayikyefa vola, Arthur Lawrence di vanpiyir ordik ke kote ayikyepokirafe gradilikye tise ke levedafa tamava tapedafa is dimblisisa, i banga ke kawoda, isen Lydia Beardsall tela banga ke kota kuranisafa is ikrezuusa ayikya ke inyona rupa. Lawrence va ikrageja to golde mulos ke gadafa tolonga lidam direfa nobara va ayikyevikeem ke Eastwood is dere intafa kurenikafa bagala di suveyer nume va rietava vas bitejafa milbava wal ayikye is ayikya wasteyer.

Radimi reilaf vayarugal, Lawrence koe iaxe va selas ugol tcilon ebuyur voxe nope rizakolafa deonera di gobuluyur, i nope daktesa sugda ke kotcakola mejetisa remi blira. Bak vogonugal bak 1901 va Jessie Chambers rungrupeyer, i va nazbeikya ke vemaf barnik. Ko Haggs Farm jontikviele laniyir ise koe tawaday doon gozayar, flideson va sinyona dofa belira ( Carlyle is Nietzsche is Baudelaire is Verlaine is sposaf francaf berpotik isu rossiaf ikz- ). Bat barn is Chambers yasa koe taneaf berpot ( The White Peacock ~ Batakaf gelang, 1911 ) zo divrozad.

Yone Nazbeye isu Fertik berpot ( Sons and Lovers ) va tinera ke rezatc wal toloy yik nope inafa vazuca is cugafa dikisuca ke gadikya ke gradilye pwader. Jessie Chambers va kubla ke Lawrence bristur ise va sanegara va inyon taneaf berpotam bak 1907 az konaka ezla bak 1909 pomar, numen batcoba noveyer da in jotaf yambik va Ezra Pound tulon kouzer. Abdi bata morafa toza, vanpitison tavesik Lawrence koe Nottingham kotla al vayar.

Mali 1908 kali 1912 koe Croydon vagee London taver voxe nope galeraja arviele di gogriflir. Bak bata rekola, konaka ayikya va yona ezla koswad : i Jessie grulumkarsafe num fure iskedane, is Helen Corke brostas dokobasik dem ilkafa izva dafutusa va remay ke Tirbusik berpot ( The Trespasser ), is Louise Burrows ugalorafa aguntanya ten skedegatana bak 1910 bal miserapa.

Bak 1912 wetce belisik ko Germana djumallapir. Va Ernest Weekley tan savsaf tavesik koe Nottingham kotla bam auzur. Va Frieda von Richthofen inaf germanaf kurenik korenar, i va ayikya loguazafa gu tevda is barocaf gadik. Sin arti abica safta ko Germana belcon mallapid. Frieda va kurenik is nazbeikeem parmon jovler. Noon W^-ye berpot ( Mr Noon ) kaikiawalkon sanegatan bak 1984 va ferimafa disukera va bata bagalara atoer.

Nekev nobafa mijera, Frieda va pestakanya ke ikrafe rumbe mea ziliyine gan Jessie pu Lawrence vanbureyer. Ina tiyir bagalakirafa ise va lana araya is pofa ilkuca diyir ise tiyir oluik ; bana kerdela tiyir zolonafa sedme Lawrence tise nazbeik ke kawodik. Larde al tiyir fertik ke Otto Gross godevrik ke Freud, pune va Lawrence gu swavadrunaropafa rietova kotaveyer. Toza ke sintafa skedegara di tiyir redupusa rekola ke Lawrence : ine va lenopapa dem toloyi ki ( The Rainbow ~ Korfi bak 1915 az Women in Love ~ Yona renasikya bak 1920 ) envayar, aze va The Lost Girl berpot ( Drasunikya, 1920 ) bokayar ise va renezlak ( Look! We have come through! ~ Wil !! Maneke su maet !, 1917 ) suteyer.

Remi tolda, fertik koe Europa dun koyad. Koe Italia tolon jonvieled, uga tiskatasa va Twilight in Italy and Other Essays ( Nom koe Italia, 1916 ) nega. Radimi tuenara va solyerumara ke Frieda, ko London dimlapiyid aze bak pereaksat ke 1917 va sint yerumad. Azon koe Engla golde geja zo elekad. Lawrence pikser kire tir kevgejevaf is kevvedeyevaf is dikis va englaf yerumanik numen dun zo arger. Zo uculed da co tid toidesik aze div Cornwall gola zo aloyayad lize al gelbeyed. Mali 1915, divvawatason va teca torigina vantenura ke Talteka, Lawrence va rietunafa doda yoltkirafa gu Rananim al djureduyur, do konak nik don John Middleton Murry malyopasik is Katherine Mansfield etorkik. Remi blira va bata giwasa klokara di wanuyur, i va klokara wal teca doeva is etrakedafa mava voxen bata ja di justeyer.

Korfi berpot ( The Rainbow ) nope vergumvelt va warze nudakter voxen va beviafa wira va selt kan izva ke baroya tolongafa oxila ke mila yasa moekote atoer. Berpot nope wolyuca bak 1915 zo lanzar. Numen Lawrence gu konaka erbargefa tanda di zo eyoder nume va alubda zo gokeyer abdida va Yona renasikya berpot ( Women in Love ) di rovosanegayar, i va kalvilarafamaf grabom lize ant melanafa afida jeber, i pokolesa afida mu tolonga divvawasa va grustes rust num tcedesa va teca warlafa jeawera nepalesa va swave is pestake. Vayaks va Thomas Hardy ( Study of Thomas Hardy ) va bat toloy berpot koafir ise va dulap ke suterotik ta yamba is izvopa is mikropa is swavadrunara is alkopa is seltaf zvakeem ke inafe sare vrutar.

Malida sin rotaskir, Lawrence tolonga bak 1919 div Engla otcer aze va Taormina koe Sicilia koirubad. Lawrence va Iba ke Aaron ( Aaron's Rod ) tenuker, i va berpot lize watsa ke nuca wal ayikye is ke andik. Va konak berpotam is deasesa koyaranega va Sardegna ( Sardegna is Mediterranea ) suter. To koe Italia va loa ezla ke Zveri is sulem is imwa ( Birds, Beasts and Flowers, 1923 ) larma buner lize va deasena kobrara va ikrakirafe tuwavafe tame is gubeon pirafa undera va ayik wanur, i va ayik tis seltaf is gaderopaf sulem firugan gan yona decemda ke yudkristeva is klokakola.

Bak 1922, Lawrence gan Mabel Dodge zo ganer, i gan kulafa amerikya blisa koe Taos koe New Mexico soka ke Tanarasokeem is djumanamzokevesa va yambik. Lawrence tolonga van Amerika koo Roneka mallapir. Va konaka safta koe Sri Lanka az baroy aksat koe Australia tiskir, lize Lawrence va intaf logaderopaf berpot ( Kangurol ~ Kangaroo, 1923 ) sutelar, i va berpot belcon dijus va torkeva is doeva.

Blison koe reda koe Taos ( Tanarasokeem, New Mexico ) wali 1922 is 1925, va amerindiik dulapeyer, ise va Mexika worayar voxe va vuga conyuta ke garif taneakaf seltay inton klokayan. Koe Mexikaf rielcek ( Mornings in Mexico, 1927 ), va migafe stute wetce bocafa stabrega skeuson pimtar. Bata amerikafa tiskira gan koyara ko Europa bak 1923 zo nonuyur, edje Lawrence va warzaf nik ganeyer enide sin va zabdura va Rananim doda koe Taos di pakeyed. Ant Dorothy Brett xadaf is tervamas lingesik renasaf gu ine tukramayar. Dim Taos, blira wal baroya ayikya ( Frieda is Mabel is Brett ) nijeyer wavdafa. Ine gu Mabel koredon gu Otcesikya ( The Woman who Rode Away, 1928 ) va int jaxadayar, i gu ayikya va int diavon dreldon wetasa gu indiaf lorik, is gu Brett koredon gu Sersikya lize ketafa europikya zo lasuboer ise di tceder.

Lawrence koe Amerika tigiyir viele gadikye bak 1924 awalkeyer. David bibliafa druntanya va kobodafa remfira mal savsafa vura ( tela ke Saül, i vola ke lane gadikye ) kal tela ke vepokaf David divrozar, i ke vokaf koredik pakon pilkomayan gan suterotik milyoltaf.

Cuesine gan lidawicka is akola, is re grupeson da kotcakoleyer, Lawrence ko Europa teni 1925 dimlapiyir. Radimi jonvielera koe London az Germana az Genova koe Italia, va Firenze koirubayar. Va naboxa ke Etrusk sane worayar nume va gedelafa ibakorafa jiluca ke bane griawiyise sane koe Nakila ke Etrusk xo ( Sketches of Etruscan Places, 1932 ) ilamsiskeyer ise va Krist zolkevackik divmodes nope jiluca va alto koe Ayikye awalkeyese ( Than Man Who Died, 1929 ) gestayar.

Fertye ke Chatterley Oluya ( Lady Chatterley's Lover, 1930 : baroy siatos krulded ) « va ibakorafa krenuguca » dere kotgruper. Bat berpot is dere inyona trutca lingeyena koe Firenze va kranavesi skudji do englaf urayasik nekiyid, i do urayasik volsiakraf gu inafa warlura isu lidopa rigavana moe koekafa tarkara va aptatcafa blira is tuwava.

Lawrence vradon koyason koe Europa va toloya bocafa tanda tiskiyir. Ba 02/03/1930 koe Vence ( Franca ) mulufteyer.